12. Wushu We-Äm: 9.07 voll verseit

Ja wies de titel scho seit hani hüt voll verseit.. leider. Han bim XFJ 540 en fehler gmacht und au sust hani nid grad mini best leistig chöne abrüefe... macht mich natürlich stinke hässig. Hets nämlich ide top10 evtl. gschafft.

Sport isch halt so.. du chasch no so viel trainiere was zelt isch de wettkampf.mal gats guet mal ebe nid. Das hani scho a paar wettkämpf muesse lerne.

Anere WM teilzne isch immer was einzigartigs und immer wieder lern ich was dezue. Ich hoffe ich chan immer wieder eso fortschritt mache wie ich jetzt gmacht han (abgse vo dene kaka fehler) und freu mich uf d saison nechst jahr.

So bald chumi wieder hei und ich freu mich sehr druf. See you!

12. WUSHU We-Äm: Nangun

Ja hüt bini im Nangun (stock) gstartet.

Bin nid eso guet gsi wie ichs gern hetti: 9.32 (23.Platz) und ide A note hani 4.9 gha. Dete weri locker es 5.0 driglägge hetti nid nomal nachem stock nagriffe. Ja nu, fehler gits.

Morn isch min letschte isatz und ich freu mich sehr uf Nandao (säbel). Nachher isch den d WM für mich fertig :)

Also morn na min letschte blog vo de WM, drucket mer alli duuuume; ich vo minere site her gibe morn nomal alles! Cuuuu.

12. WUSHU We-Äm: Min erste isatz

Ja also hüt bini mit Nanquan (waffelos) gstartet.

Wie immer hend alli bim ufwärme supper usgse.. jede het supper sprüng und sehr gueti bewegige gha. Da das scho mini 4.WM isch, weiss ich dass das was bim ufwärme zeigt wird nid immer mit dem am wettkampf übereinstimmt.
Die einte haltet gar nid dure und schaffets gar nid über die ganz form kraft und kondi durezzieh und anderi wiederum sind am wettkampf besser als im training.

Egal..ich han mich vo dem nid gross beidrucke la aber es isch ersrunlich z gse wieviel natione ufgstige sind und supper athlete gha hend. Vor x jahre isch eifach china mit abstand top gsi und hüt mischet alli asiate mit. Europäer und südamerikaner sind au sehr sehr stark worde und chönd mit einige asiate mithalte.

Also ganz ehrlih ich bin weniger nervös gsi als wie ame turnier ide schwizz. Vilicht isches au will ide schwiz ich natürlich immer s beste erwarte und jetzt hani me denkt "mach das was d chasch".

Woni denn ide wettkampf halle gsi bin und gwartet han bis de ander vor mier fertig isch hani mer gseit "de teppich ghört mier und all die lüt sind alli da nur zum mich gse! Alles dreit sich um mich und alli andere sind näbesach (so ala vorbänd)". Eso z denke git mer einersits kraft andersits erlösts mich au vorem "ou was isch wenns schief gat" gedanke. Ich nimms eso wie anere vorfüehrig wo du eher dra denksch dass alles geil si muen und s am publikum gfalle muen als was schief ga chönti.

Also zu minere performance: ich bin sehr happy!!!!

Han gar kei fehler gmacht und han alles durezoge. Mini note isch 9.52 und de erst plazierti het 9.63. Da gseht mer eifach wie eng es isch.. ich bin elfte worde und de vor mier het die glich note wie ich und de nechsti het 0.01 meh.

Wieder ide top10 zsi weri natürlich scho s allergeiste gsi, aber die note woni jetzt han..isch für mich mega und e riise bestätigung für das wasi bis jetzt gmacht han. Aber ebe wend weisch dass 0.01 für top10 glanget hetti denn keykts di scho ahh so ganz bitzelii :) bin aber happy...!!

Morn hani pause. Wiiter gats denn für mich übermorn am abig. Bis bald.

12. WUSHU We-Äm: Akunft, training und so....

Also nach mim training in shanghai bini uf kuala lumpur gfloge aber d frag isch wie bin ich uf K.L. gfloge? Natürlich business, #daninöd :)

Ca. 4 täg vorem abflug hani es mail becho: für knappi 40euro (75% discount-la) hani chöne uf business upgrade (flat bed yeah!!)

Acho in K.L simmer grad abgholt worde und direkt is geile 4stern hotel. S hotel isch echt de hit und s zimmer isch au sehr schön. S esse isch au supper, was nöd a jedem wettkampf selbstverständlich isch!!!

Am nächste tah hämmer team training gha. Jedi nation het uf trainingsflächi chöne ga und nachher denn ufd wettkampfflächi. Im training hani en ganz nanquan gmacht (also so als wers de wettkampf). Das hani eigentlich na nie so vor eme wichtige wettkampf gmacht, aber in shanghai im training hani das immer muesse mache und das isch perfekt gange also hanis au da im training gmacht. Jop s training isch perfekt gsi.

Am abig hemmer "opening dinner" gha mit so show und so. Also jedi nation het me oder weniger en tish für sich allei gha und hend gässe. Es paar wichtigi vo de organisation hend e red ghalte und denn hets na e geili wushu show ge.

Was ich sehr cool gfunde han isch dass si vo jedere nation paar video zeiget hend (zemeschnitt us paar youtube vids).
Alles im ganze perfekt organisiert!

Also morn abig gats für mich los mit nanquan.

Es het viel gueti lüt ume und viel neui wo au sehr guet sind.Isch au logisch bin ja au ade wushu wm!!! :)

Ich fühl mich guet und perat. Eigentlich chönt ich jetzt grad explodiere vor energie während em schribe aber wet mis handy nid kaputt mache :) ich spar mer die kraft lieber für morn uf.

So, me gits glaubs nid z verzelle.. guet nacht.

Business platz!!!!

Training

Shanghai: trainingsplan bis bye bye Shanghai!

Also ich han ja uf FB scho mal de trainingsplan postet wo de XFJ für mich gmacht het.
Er isch eigentlich ganz eifach und für mich isches au nix neus will ich au ide Schwitz eso vorem Wettkampf trainiert han...



Die chinesische zeiche ganze obe wo vo links nach rechts gönd stönd für d wuchätäg (MO-SO)
D zahle 18-30 stönd fürs Datum. Also 18.10 - 30.10 (denn flügi uf Malaysia).

Näbem 21 stat "mor, aft und evening". Das stat für s training am morge, namittag oder abig.
Überall dere wos es "I" hät mueni 1 ganzi Form zeige. Also vom 21.10 - 25.10 mueni immer 1 ganzi Form am morge zeige, will uf de gliche höchi isch wie "mor".

Dete vo "P" oder "Power" stat, dete mueni kraft training mache. Vom 28-29.10 mueni nur no helfti vo de form mache..."half" sött das heisse. Am 29. am namittag & abig hani denn kei training, defür werdemer am morge richtig pumpe,.. vorallem mini bei.

Wie immer bin ich immerna erstunt, dass uf mich so guet gluegt wird - umso me macht natürlich alles spass!

Also.. ich glaube ich wird nüme so viel schribe bis zur WM - änderet sich ja nüm viel.
Ich wird sicher no en abschluss trainings blog mit rückblick und so gschmeus schribe...

Bis zum nächste Blog.

Shanghai: schön drigleit hends mich!

Also hüt isch de test-tag gsi. woni all mini 3 Forme so han müesse zeige wie am wettkampf.

Ufgstande bini mit gmischte gfühl; han na de aschiss vo de letschte 2 Täg gha, aber bin glich voll motiviert gsi.

Ablauf wie immer.. echli ufwärme, grundschuel, sprüng und denn hani mich umzoge und mis Wettkampf-gwändli agleit. Denn chunt de trainer und seit: "Sami, last 2 days was..ehmm zeme shuo <was so viel heisst wie "wie seit mer", holt sis handy, tippt was ihh und zeigts mer> JOKE! We want to test your..ehmm zeme shuo <tippt wieder was ufem natel ihh und zeigst mer> MENTAL and you are very strong!"

Läck mich häts fast glupft!!! Also dass die eso wiit gönd hetti nid denkt. Usserdem chan ich ihne doch ziemlich egal si, starte ja nöd für Shanghai oder so. Naja das het er mier grad öppe 10min bevor ich min ersti form zeigt han gseit und ich han nur denkt: ier affe hend mi sooo was vodrigleit, haha, jetzt bin ich dra!

Mich mental z "stresse" oder "fertig z mache" het bis jetzt eigentlich nur eine gschafft - de Dani M.

Hahah Dani. M. - tönt wie.. naja egal! Ufjedefall das isch eine wo mich mental scho recht het chöne herusfordere, aber er het mich natürlich au wieder chöne ufstell und das alles mit nur es paar wörter! (wänni chönt würi jetzt en kuss-smily dadri poste aber kei ahnig wie mer smilys da ine pflanzt!!!) 

Han alli 3 Forme ohni fehler durezoge, was mich sehr gfreut het. Wet jetzt nid gross über mini performance rede. 

S highlight adem ganze ding, isch dass de ober-trainer "Yang Laoshi" nach mini performances klatscht het und es "thumbs up" zeigt het. Ich han gar nöd gwüsst dass de klatsche chan?!?! HAHA!

Ufjedefall bini jetzt befreit vo dem doch ziemlich unagnähme druck! Bin jetzt au ziemlich müed. Eigentlich genau eso müed wie nach ere EM/WM. So plötzlich gspürsch eifach die erliechterig dass es dure isch und bisch nur no müed und gähnsch all paar minute mal wieder.

Also im nachhinein find ischs scho mega lässig dass sie versuechet alles us mier usezhole und mich würklich so guet wie möglich uf d WM vorzbereite. Aber das was ide letschte 2 Täg abgange isch wünsch ich keim! Isch ja au e gueti art und wiis de athlet z teste wie er mental alles ushaltet, aber ich glaube es git anderi wäg :)

Falls ich dich mal trainiere und ich dich 2 täg lang nur zemeschisse und dier säge dass alles schlecht isch, immer de kopfschüttle, eini rauche.. nei wart das tuen ich nöd.. ok denhalt immer was am esse bin, denn siches nid will ich dich test wil, sondern will du würklich schlecht bisch :)

2 Wuche vorem Wettkampf wür ich dich natürlich scho bitz sanfter behandle..hihi.

Wie gats wiiter? 

Stell der vor, ich bin eso müed, dass ich nid mal was grosses gässe han *skandal!!* !!

Ja, s esse isch jetzt fehl am platz, sorry.

Morn morge hani eigentlich frei, aber ich wet de morge nutze zum die sache z verbesse wo mier im Video nid eso gfalle hend. Also wird ich morn es ego-trainig mache, aber es ganz lockers.

Nachher mach ich wiiterhin immer 4 ganzi forme am Tag und versueche eifach das level vo jetzt, so guet wie möglich z halte und die fiIIne sache z verbessere.

Trotz minere müedigkeit isch mini batterie für d WM voll ufglade (han mehrei batterie, unter anderem au eini fürs esse..hihi) und chans kuum erwarte endlich det here zga! GAMBADEE!

Shanghai: nöd jede Tag isch rosig!

Ja also die Wuche het für mich nid eso toll agfange..

Am Mäntig han ich am morge und am abig training gha. I beidne trainings hani glaubs nüt richtig gmacht, oder nid eso wie sis hend wele. Entweder bini z langsam gsi, z wenig kraft, zu lasch oder sie hend eifach de kopf gschüttlet.

Hüt isches au nid besser gange. Han zwar immerno ganzi forme gmacht aber s feedback isch eifach es kopfschüttle gsi. Toll gäll?

Also eigentlich denk ich ebe scho dass ichs richtig mache oder besser als vorher ufjedefall, aber ja irgendwie passts ihne ebe doch nid!

Tja, han denkt ich lahn eu das wüsse. Nid jedes training verlauft super und au wänn alli andere blogs so positiv übere chömet hets au scho ab und zue mal echli es down ge. Aber die 2 Täg sind grad echli heftig gsi.

Morn isch denn de grossi test-tag. Hoffe es klappt denn alles guet und si wenigstens eis chlises positivs zeiche gänd!

Irgendwie machst mich au hässig, dass de trainer ide letschte 2 täg alles nid passt, aber morn zeig ichs dene scho!

Bis zum nächste Blog...morn abig denn, nach de tests!

Shanghai: a little better Sami - "hoa i dien"

Huhuuu da bini wider :)

Also kurzi Agenda über das woni idem Blog brichte wird. So bisch du als leser ide lag gwüssi kapitel, wo für dich uninteressant sind, züberspringe - clever gäll?

- mis training bis jetzt
- EKG
- mis training ab nechst wuche
- warum ich immer bilder vom esse poste

mis training bis jetzt
Bis endi letscht wuche hani viel neui sache glernt und probiert die sache woni scho chan no besser z mache. also es isch so zssäge sehr viel abwächslig im training - mal das mal dieses.
Au hemmer ebe viel kraft training gmache und sustigi üebige wie ich scho i mim vorherige blog gschribe han.

Sit afang dere Wuche hani afganage ganzi forme z mache - also so wie am wettkampf.
Woni in shanghai cho bin, hani scho ide erste wuche ganzi forme müesse mache, demits mal gsend was ich guet oder schlecht chan und dete hani zum teil 1:48min gha for z.b. Nandao.
Für die wo kei ahnig hend vo dem ganze: muesch min. 1:20min ha und es git kei begrenzig nach ufe aber normalerwiis hesch so zwüschet 1:20 und 1:30.
Nachher het der Yang Laoshi und de XFJ gmeint gha ich sölli afange d forme so wie d chinese z mache, ich heg die nötig kondi und kraft. Also hemmer denn echli afa ade forme umebastle....

De chinese iri forme hend meistens kei grossi pausene. also nachdems all iri sprüng gmacht hend ziends eigentlich d form dure bis zum schluss oder mindestens 2 lenge a eimstuck ohni grossi pause.
Naja, die idee hani nid eso toll gfunde will ich die pausene amigs scho bruche :)

Also hani paar moves müsse apasse so dass ich ebe grad die nächst längi/linie chan ahenke und das macht eim ziemlich kaputt. normalerwiis han ich mich immer adenen pausene orientiert so ala "jetzt gisch mal alles bis zu dere pause" und denn bi dere pause hani denkt "jetzt gisch halt wieder alles bis zu de nechste pause" und jetzt mueni halt umstelle uf "pause? kenni nöd. dure zieh bis zum schluss - dete hani denn mini pause" :)

S denke isch ja no eifach aber s usfüehere isch denn bitz schwieriger. mini bei hend afange brenne wenni amigs kei pause gha han und ich han au scho müesse de stock/säbel schnell losla wil ich en krampf am unterarm becho han. 1mal hani kum d finger vom säbel wegbracht willi de krampf bis zu de finger gsürt han - ja arme sami, gäll? Und eimal hani de krampf am oberschenkel becho - läck het das we ta. Ok gnueg vo mim liiide, für das lisisch ja de blog nid :)

Also wo bini gsi.. genau d forme umstelle. Ich han mega viel bewegige ibaut vorallem ide 2. längi (nach allne sprüng). Sie hend gmeint die 2. längi muess die explosivsti hängi si, ich muen abga wie es zäpfli :) und nachher mueni grad die 3. längi ahänke. Easy hert imfall!

Mit viel viel viel viel viel viel würklich sehr viel kraft- und konditionstraining hani irgendwie gester am morge 1:27 min gha mit Nandao. Ich han x-tusigi vo bewegige ine ta und bin knapp 20sekunde schneller gsi als am afang?!?! findi geil! Aber im Video erkenni wieder tuusig fehler, oder sache womer nid eso passet. die mueni denn verbessere (und nei ich lade kei videos vom training ufe!) Ufjedefall freut mich das, ich han scho denkt ich heg denn fast 2minute oder so für d form.

Nach dem ich en ganz Nandao gmacht han und 10 lengene meint de trainer ich söll am namittag nangun (stock) mache.. au die ganz form plus 2mal jede helfti. Easy hani denkt.
Was ich ebe nid gwüsst han isch dass ich nachem ganze 30 sekunde pause han und nach jedere helfti nur 15 sekunde pause !!!!!!!!! Ich bin nur no am schnufe, am schwitze, am stinke und vor mier am umeschreie gsi - ide hoffnig es hilft d luft besser z schnappe. Nei echt, das isch mer echt z viel gsi, aber irgendwie isches ebe scho geil - HAHAHAHHA!

Hüt morge hani nanquan (fuuschtform, also kei waffe) trainiert. Han 1 ganze gmacht und isch alles recht guet gange. Am namittag hani wieder Nandao (säbel) gmacht 2 ganzi und 4 helfti. Da meint de XFY (xie fu yan - das isch de typ woner amigs gsend uf de feteli woni im FB ufeglade han) "a little better Sami" - das hani no nie vo ihm ghört und er hets öppe 3 mal vor sich gseit und debi gsmilet und Yang Laoshi (de haupttrainer wo eigentlich nur ufem stuel sitzt, ab und zue was seit und sust sin tee trinkt und sini zigis raucht) "hao i dien" was so viel heisst wie "guet so" - das stellt mich doch scho uf und macht mich happy  (fast so wie wenni was guets esse .. haha )

Upps.. han echli zviel gschribe glaubs.

EKG
Für d WM, wo i knapp 3 Wuche in Malaysia stattfindet, hani müesse es EKG mache. Es derf nid älter wie 30 täg si, darum hanis nöd ide schwitz chöne mache.

Mier sind ines spital gange wo nid wiit weg isch. es isch recht gross gsi, das alles hets dete gha:

Und ja das isch s resultat devo - lueget mal wies min name gschribe hend ufem EKG streife. Und sie hend sogar min Pass ide hand gha!!! - haha:

Sami Ben Mahmoud - eifach für s nächstmal bitte!

Irgendwas1

Irgendwas2

Zu dem hani ebe no die Memberkarte becho woni uf FB postet han. dete sind all mini date wie "Sami Ben Tpubhnrof" gspeicheret und so. Wenni also wieder dete ane gahne (was isch nid hoffe) denn mueni nur die karte abge und scho hends alles. Ach ja das ganze het nur 20 RMB kostet (ca. 6-7 chf) HAHA!

mis training ab nechst wuche

So nächst wuche isch nüme lustig. Muen a jedem training 2 ganzi mache. da ich morge und namittag trainiere mueni also 4 ganzi am tag mache. Und am mittwuche namittag isch de grossi test-tag. Am morge hani frei (chan usschlafe) und am namittag mueni denn allli 3 forme zeige mit wushu chleid und so. Je nachdem wie min uftritt sie wird, werdet trainer mis training für die nechste 3 wuche echli apasse.

Ich chan eu eis säge ich han esones glück dass ich eine han wo uf mich luegt jede tag! und das isch nid irgend eso en uni-student oder sust irgendeine wos eifach bitz besser chan wie ich oder so.
Er isch xmal besser, en kolleg und er trainiert mich richtig. Er isch hässig wenn ihm was nid passt oder ich was nid guet mache und seit mer aber au wenns gnueg isch und er zfride isch. Er kenn mich und weiss was es heisst sich uf en Wettkampf vorzbereite.
So was krigsch z China so guet wie nie - und das vome Profiathlet!
Die wo scho mal z China trainiert hend wüsset was ich meine.

Normalerwiis bisch ebe meisten eifach mit de gruppe am mittrainiere was ja schön und guet isch aber wend en Wettkampf hesch isch halt s training scho anderst. S ufwerme und grundschuel machi immer mit de gruppe nachher denn allei echli details aluege mitem XFJ und wenni denn e ganzi form mache, machet alli platz und lueget zue. Das isch glaubs au nume will ich die lüt guet kenne und fast all 2 jahr da ane chume. Ok jetzt schweifi wieder ab vom thema, sorry.

warum ich immer bilder vom esse poste

Bis froh poste ich d quittig au nid mit! :) Also gnüsset lieber das feine esse uf dene bilder inkl. mim neue häshtag #dunöd :)

Bis zum nächste Blog!

Shanghai: Training, alltag und so...

Lang kein Blog me gschribe, Sami! - het mer letschti en dude/chic (ich lans eu offe selber z entscheide wers chönt si) gseit.

Ja es git echt nid viel z verzelle. Ich läbe eigentlich rächt es ei-sitigs läbe z Shanghai.
Das bestat meistens us esse,training,esse,schlafe,training,esse,esse,esse und vilicht nomal esse wenni würklich hunger han (kein Witz jetzt).

Ich triff mich ab un zue mal mit kollege us shanghai aber meistens nur am wuchened.

Uf Facebook hani ja scho paar pic postet zum training, dere sch**** treppe und dem geile massage stuel.

S training isch immer chli anderst, mal konzentrieremer eus uf Teili oder Längene eso z mache wie am Wettkampf (d.h. du ziesch dis t-shirt us schreisch mal ide halle umenand und denn gisch 1 längi eifach vollgas) und mal konzentrieremer eus jedi bewegig richtig uszfüehre. D.h. du machsch denn das ganze immerno mit voller kraft aber nüme i dinere höchste gschwindigkeit. S ziel sötti denn sie, dass du beides zeme chasch, aber wenn du nur dini forme ganz schnell dure ziesch denn lernsches ja nie! Darum de mix vo beidem.

Ja und denn gits die huere nandu (sprüng) trainings. Mier wärmet eus uf (15min ufem laufband bi 10km/h konstant renne), denn dehne, chli grundschuel, denn gats aus cho los mit springe. Amigs machemer jede 3mal all sini sprüng vo allne forme ohni fehler. Wennd 1 fehler machsch denn mues die ganz gruppe 80 oder 100 Sprüng mache (je nach dem wieviel mer gard sind). Han bis jetzt kein fehler gmacht wenns druf a cho isch (isch ja eher mini stärchi, d sprüng),.. aber die andere machet ab und zue mal fehler (klar, machet ja au 720er sprüng!!!!).

Trainings wo mer nur krafttraining machet gits au. Aber mier pumpet eus nid eso volle wie ier jetzt das denket (so CT Fletcher mässig machemer das also nöd ..haha). Mier machet meistens üebigi ohni gwicht zum stabilität ide bei, buch und rugge stärke, üebige mitem terra-band (das flexible band) oder ganz kranki üebige für d bei. Wemmer de oberkörper trainieret denn eher mit weniger gwicht und uf ziiit.

Ufjedefall gfall mer das ganze training (logisch!). So han ichs ja scho vo ihne früener (2009/2011) glernt und han denn au ide letschte paar jahr mini trainings eso ufbaut. Nur ebe 2mal am tag training uf some höche niveau 6mal ide Wuche, isch denn doch öppis ganz anders - und genau das bruchi!

Ach ja was ganz wichtigs hani no vergesse, wennt wetsch wüsse wie ich mini kleider wäsche, denn da es paar pics:

Das sind 2 Wöschmaschine. Da tueni mini stinkige kleider ine denn 2 löffeli Wäschpulver wo ich immer vom Justin Bieber bechume (so nännt d milly de Wang Peng Chen - er isch en riiise fätze) jo und denn gats los. Ich mache de deckel zue, drucke die taste ganz rechts und denn die 2.vo rechts. Kei ahnig was die taste bedütet, will es stat ja alles uf chinesisch, aber so isches mier zeigt worde. 

Wenns fertig isch holi mini chleider use und tuen si eso ufhänke (sind mini kelider da druf). Spannend gäll? :)

Ahja apropos Justin Bieber. Letschti hets mer schier eis ge!!!!!

Mier hend grad esones training gha wod ebe dini Länge/Bewegige eso hesch müsse mache wie am Wettkampf. Also vollgas ge und so richtig motiviert! 

Denn lönd die tatsächlich JUSTIN BIEBER laufe! Ich hans nümme gse... und de einti singt no mit sim unklare english uns summt vor sich ane! Ok 1 lied, nachher chunt sicher was anders.. irgend es chinesisches liebeslied oder sust irgendwas vo de charts. NEI, nomal Justin Bieber. 

Nach öppe 15minute JB (mini chli schwöster het mer bipracht dass mer de typ au "JB" nännt) hani denn usegfunde dass de einti sis album laufe la het....FUUUUUUUUUUUUUUU das gat ja no lenger!!!! 

Shanghai: 19.09.13

Also ich wird nid jede tag blogge darum verwend ich jetzt s datum als titel.

Gester hani eifach nur trainiert, da gits nid viel z verzelle...und hüt eigentlich au.

S ufsta hüt morge isch eigentlich am härischte gsi. Alles tuet weh und am liebste wetsch eifach no es paar stündli wiiter schlafe, aber das gat nid. Ziemlich kaputt bini denn go zmörgele und nachher is training. S schlimmste isch eigentlich s ufwerme. Du muesch dich eso richtig motiviere, du weisch dass wenn du dich richtg ufwermsch es nachher viel eifacher gat (alles isch warm und du hesch kei schmerze meeh) aber bis du dezue chunsch...puhhh da muen au ich mich mega zemerisse!

Letschtendlich hanis denn gschaft und han vollgas ge.

Am namittag hani nandao trainiert und de "Wang Peng Chen", für mich isch er de chinisischi-Hulk, het mer debi ghulfe und es paar so feeling sache zeiget. Also wo sötti echli langsam wo bitz schneller, wo anderst ischnufe und so... so mega detail sache wo aber die 0.04 denn usmachet - und das chani sehr guet gebruche.

Denn irgendwenn währendem training stat de trainer uf (und er stat imfall nie uf!!! chasch de rolf fröge, de stat echt nie uf!!!) lauft zu mier ane und seit irgendwas uf chinesisch ziemlich lang... ich frage en andere athlete "what did he just say?" er so :" he said you train very good and very hard unlike other foreigners you train like you are in a competition... now you should make your competition to a training! jiayo".

eigentlich no e spezielli asicht.. zerst isch mer immer gseit worde ich sölli jedes training ernst ne wie en wettkampf und wenn ich ufem teppich stahne und mini längi uebe oder so denn söll ichs eso durezieh wie ame wettkampf. jetzt seit er ich sölli de wettkampf eso mache wie es training. isch eigentlich s gliche aber wend zerst s training zum wettkampf machsch und denn de wettkampf zum training hesch me devo wie umgekehrt. tschegsch was ich meine?

also wenn du zerst din wettkampf zum training machsch chas si das de wettkampf kaka isch, will du nid guet trainiersch. wennd aber zerst dis training zum wettkampf machsch denn trainiersch natürlich zimelich hert und denn wird de wettkampf besser. jajaja.. bin eifach überrascht gsi dass er ufgstande isch :)

Nacher .. und jetzt chunt s highlight. Lauft eifach de YAO MING ine (NBA Superstar, wohl eine vo de bekanntiste internationele chinese wos je hets gits).  Läck isch de gross. Ich han ja im 2007 scho mal es foti mit sinere wachsfigur in shanghai gmacht..aber ebe nur wachsfigur. In real lauft er ebe no... haha und er redet au.. hahah! Ja uf jedefall de isch riiiisig!

hahah.. isch no geil. Google erkennt mehreri pics und macht grad es GIF drus (für die non-computer freaks, es GIF sind eso mehreri bilder zeme ime mini-filmli)

So, morn morge hani frei (zum glück au- chan die pause guet gebruche). Nacher gahn ich mitem Mauro go esse. Ich han also jetzt trainiere und und nüt gässe, läck han ich hunger. Mier gönd go koreanisch essse, das wird wieder e schlacht! :) Vilicht gömmer au no use da ich morn frei han..

88

Shanghai: Tag 2

So hüt gits nid viel zum schribe. Han bis am 7ni am morge gschlafe denn bini go zmorge esse ide Kantine und nachher wieder go schlafe bis am 13:30 (han ja am morge kei training gha). Am namittag am 14:30 isches denn los gange.. mis erste training!

Zerst mal am "Yang Laoshi" hallo gseit, paar wörter ustuschet denn OK-LA -> training.
Zum ufwärme hemmer fuessball gspilt. Also ein kreis mache und eine ide mitti wo de bölle muess berüehre.
Jajaj... denn dehne, grundschuel, denn jedi längi 6mal und jedi helfti 4mal (nanquan). Jedes training e anderi Form. Also hüt namittag hani NQ gmacht morn morge denn ND und am namittag denn NG.

Nachem training hemmer no echli buch und rugge trainiert denn bini go znacht esse ide Kantine.

3h spöter hani wieder hunger gha und bin mer das go hole:

Das resti macht d nudle vo hand also so mit teig und so... gset idrücklich us wie sis machet.
Nudle, rindfleisch, herdöpfel-stückli, peperoni, zwible, karotte alles inere feine sauce.
Kei ahnig warum ich wieder hunger gha han, aber ich finds guet so! :)

Ach ja das ganze het 12 Yuan kostet!!! 2 STUTZ! Guet nacht!

Shanghai: Tag 1

So ich bin super guet acho.

Wie gseit, es het keis gschiss ge wegem übergepäck, han en notusgangsitz gha und es het IRON MAN 3 im flüger gha. Was wetsch na me im läbe? :)

Woni glandet bin isch alles zimelich schnell gange....nöd. Passkontrolle in Shanghai het wie immer x-minute brucht zum mis müede gsicht mit dem gsicht ufem Pass z kontroliere und nebet tüends no irgendwelchi formular x-tusig mal abstämpfle und machet debi fast de tisch kaput.

Am flughafe selber bini vom Yang Yu Hong abholt worde mit sim auto (die wo ihn nid kennet chönd en mal youtu-be). Er isch en profi vom shanghai wushu team und mier kennet eus scho recht lang und guet. Er het jetzt e frau (verhürotet) und sit knapp 2 monet au scho e tochter.. er isch also ziemlich viel wiiter als ich. Aber ja über das wetti jetzt nid diskutiere. Oder wetsch drüber rede? :)

Acho bim shanghai wushu team (Baise Lu 1333) het er mier mis zimmer zeiget (Zimmer 106). Ich han 2 better, die tueni glaubs mal zeme legge, en chline tisch, so en wasserbehälter, duschi und kaka-platz und en TV. Ziemlich gemütlich aber es stinkt da inne. Ich hoffe min schweiss überdeckt de gstank mit de ziit, wenn nid mueni unbedingt s zimmer wechsle. Ach ja Internet hani au, und grad vorher han ich mer no es WiFi ding kauft. Jetzt hani also WiFi im Zimmer.. fast wie in Züri diheime, abgse vom chlinnere fernseh ;)

S wichtigste thema, wie laufts mitem training? Morn namittag gats los. Min plan gset wie folgt us (ich schrib en uf english demit d uslender wo kei dütsch chönd au was verstönd):

Monday: morning no training,  afternoon training
Tuesday: morning & afternoon training
Wednesday: morning & afternoon training
Thursday: morning no training, afternoon training
Friday: morning & afternoon training
Saturday: morning & afternoon training
Sunday: no training

Nachher simmer zeme go esse, er het wele in "blue frog" ga, dete simmer scho paar mal gsi letschtjahr zum brunche ..hihi. Also simmer dete go brunche.

Er isch denn nachem brunch heigange und ich bin go geld wechsle (was ich immer wieder hasse). Du wartisch ewigs lang bis du dra chunsch, denn redsch mit eso einere wo hinter some plexiglas ding stat und die redet über so en lutsprecher und schreit dich halbe ah.. und wie immer chömet die tuusig formular und tuusig stempel wieder. Ufjedefall hani letschtendlich mis geld chöne wechsle!

De Mauro, en langjährige guete kolleg, lebt scho sit 2007 in shanghai. Han ihn den troffe und 87mal chasch rate was mer gmachet hend? ganz genau mier sind go ESSE (ja obwohl ich erst grad brunchet gha han!)
Er het au scho was gässe gha, aber mier hend glich was wele esse also simmer go hongkong style esse. Hend zwar nid allzu viel bstellt aber es isch grad guet gsi.

Am abig hani e kollegin troffe wo ich scho lenger kenne sit ich in shanghai bin. Sie isch vo mexico und gat leider übermorn für immer zrugg uf mexico (8 jahr in shanghai glebt).
Was hemmer unterno? Mier sind go.. jetzt chumts... ESSE!
Wieder Hong Kong style aber ime andere restaurant. Natürlich isches mega fein gsi!!

So nach all dene schöne moment chumt jetzt was ganz schlimms. Ob wohl ich mer gseit han dass ich nid in Nike store ine gahne, bin ich glich inegange und han mer en Rucksack kauft. Ich han sowieso eine in Shanghai wele kaufe (echt jetzt!!), aber nid denn wenn ich mer selber verbüte in Nike Store inezga. Nervt mi richtig, aber de Rucksack isch so richtig satt! S foti isch entstande bevor mer inegange sind. Woni mitem Rucksack usegloffe bin hani keis wele mache.

haha..erst jetzt fallts mer uf "DO IT." grrr und ich hans echt gmacht!

Und jetzt bini diheime am schribe und s zimmer stinkt immerna. Bis zum nächste mal!

OK-LA my english speaking friends (or non swiss friends) here a short summary:
I am in Shanghai and you are not! hahaha

Yang Yu Hong picked me up at the airport with his new car (he's now married and has got a baby!)
After that we went to the training place and he showed me my room. It's ok-la, I got 2 beds (which I will put together at some point), TV, water, table and internet (now even with WiFi). However it smells a bit strange here so I hope it will change in the next few days, if not I will try to change the room.
Above you can see my training plan for the next few weeks. It will write down more details soon (like when I train jumps, when full routines, when power training etc.)
After that I had a brunch with YangYu Hong and then lunch with another old friend from Switzerland.
In the evening I met an old friend. She's living in Shanghai for arround 8 years and is leaving in 2 days back to Mexico 4ever. So we went for dinner - Hong Kong style. Conclusion: It was a day full of food !!!

Now I am here in my stinky room :) See you on the next blog!

Ab nach Shanghai!

Ja, es stat wieder en grosse Wettkampf ahh - Wushu WM 2013 in Kuala Lumpur - und ich gahne wieder go trainiere uf China (Shanghai).

Trainiere wird ich wieder bim Shanghai Wushu Team (wo sust?) für knapp 1.5 Mönet und denn gahni direkt ad WM - ja ich freu mich riesig! :)

Ich wird versueche regelmässig z blogge.... über s training, shanghai, esse, usflüg, vorbereitig uf d WM, vo de WM selber und eifach alles mögliche wo eu iversüchtig mache chönti ... haha!

Ja wie hani mich uf China vorbereitet?
Nebst em Visum, Reisedokument und de riiiiiiiise vorfreud han ich natürlich druf glueget dass ich ziemlich perat det here reise. Was heisst perat für mich?

Perat heisst für mich, dass ich alles us mim trainig usehole chan was ich ide Schwitz mache chan.
Wenn ich uf China goge trainiere gahne denn wet ich, dass ich dass ich mit allne mithalte chan und ich ebe die sache chan lerne wo es sich ebe lohnt uf china zga.

Konkret han ich scho min Forme für d WM zeme. Paar bewegige wird ich sicher no apasse dete aber im grosse und ganze hanis zeme. Kraft und Kondition isch au da - klar, chan immer me si, aber ich han mich eso vorbereitet wie wenn ich jetzt scho ad WM gar wür.

Also uf jedefall bini perat für e richtig guets training in shanghai!

Han jetzt alles packt... alles isch i dem riise koffer. Hani alles debi? Was vergesse? Logisch hani was vergesse... aber was genau fallt mer den erst i wenni im flüger bin oder so :/

Han jenes trainingskleider mitgno (bruchi ja am meiste) und ganz ganz viel schoggi.

Ich flüge am 13:05 ab und lande ca. 7:10 morge in shanghai  - ich han d erfahrig gmacht dass es beste isch durezmache (wach z blibe über d nacht) denn direkt an flughafe zga und den im flüger z schlafe - han en direktflug.

So jetzt hani grad icheckt. Ich han en riise samsonite koffer wo es leergwicht vo 5.5kg het... ja die wo die letschte paar täg mit mier verbracht hend, hend scho viel vo mim problem ghört :)

Uf de wag hani 29kg gha.. nur 23kg derfi mitne. Da het si mich botte 5kg usezne... OK.

Han en grosse sack voller schoggi usegno.. ja genau das het 4.5kg usgmacht. Hani den is handgepäck verstaut. Us neugier hani wele wüsse wie schwer mis handgepäck isch - satti 14kg!!! Die am schalter: das hani jetzt nid gse.

Han den gfunde gha...da die eso e netti isch und ich eso en kommunikative da chani doch grad me verlange und han si gfröget obi en upgrade oder so chönti ha...hihi.

Sie so; ehmm mit eme notusgang sitz bime langstrecke flug chasch glaubs nid motze. OK.

Probiert hanis ja ... :)

So jetzt bini im gate. Wie merksch dass du uf china flügsch? Ganz eifach bim ufruef d business class uf rechte site azsta und economy uf de linke, gönd alli uf die recht site. Wenns den uf die link site übere gönd denn stönds eifach vor dier ane. Ach ich liebs!!! Haha.

Notusgangplatz isch scho geilomato!!!

Ach ja das violette chüssi sött mer helfe besser izschlafe im flüger :) 

So han glaubs gnueg gschribe.. jetzt stelli mal alles ab und warte bis es chic mier zeigt mer türe vom notusgang öffnet ;)

Bis zum nächste Blog!

@Milly: jep han dini schoggi au mitgno ^^

Wushu-Sprüng

Wen du moderns wushu machsch oder wetsch mache denn chunsch nid drum ume es paar sprüng i dine form izbaue wen du e einigermasse gueti note ha wetsch.

Ich wet jetzt da nid über d bewertige vo de spründ schribe sondern dier me ufzeige was du für üebige chasch mache zum dini sprüng besser z mache.

Zerst e mal wetti was klarstelle:
Ich bin e riise pfiffe wenns ums springe gat; Vor bestimte sprüng hani angst und ich bin überhaupt nöd gebore für d sprüng (es git lüt die trainieret 1mal im jahr und springet scho wie chinese..). Ja das isch leider so.

Was ich demit säge wet isch: wenn ichs irgendwie gschafft han, denn schaffsches du locker! :)

S wichtigste isch uszfinde i was du schlecht bisch.
Hesch kei Sprungkraft, isch dini Technik falsch oder isch dini Sprungkorrdination (s timing vom Springe) nid ideal. So tuen ich eigentlich mini üebige ufteile.
Wenn du die 3 Sache guet beherrschisch, denn gset en sprung sehr eifach us!

Wie findsch das use?
Wenn du nid vom bode weg chumsch denn fehlt die Sprungkraft.
Technik fehlt der denn wenn du de sprung wo du wetsch mache (z.b en 540) au nach 2 jahre nid chasch. Sprungkoordination isch denn falsch, wenn du sust amigs höch springe chasch aber du weisch irgendwie nöd wie du das bime bestimmte sprung chasch usehole. Ja eigentlich siches ziemlich glich wie Technik aber es git würklich lüt wo die 3 Sache separat üebe müend. Ohh ja was ich no vergesse han isch s Stabilität. Das sich extrem wichtig für d landig und vorallem für d dreig während em Sprung. Wend nöd stabil bisch ide luft denn bisch meistens schräg oder landisch nid suuber.

Es git tatsächli lüt wo Sprüng au ohni die richtigi Technik chönd,... aber denn isches me es "riissse" und nid en subere, schöne, stabile sprung.

Ganz persönlich isch das für mich s schlimmste gsi zum trainiere will's bi mier immer ziemlich langsam vorwärts gange isch. Dezue chumt no, dass ich das alles me oder weniger selber han müsse usefinde und lerne - ich han niemert gha wo mier 1mal ide Wuche gseit het; das und das isch nonig guet. Und ja letschtendlich hani au s meiste z china glernt was d sprüng abelangt.

Also gnueg vo mier.. jetzt zu dier!

Ich han mer dasmal es Video gmacht zum dier paar üebige z zeige :)

Wie immer bini gspannt uf eue feedback!

Kommentar?
Tuen "Name/URL" uswähle wenn du din Name azeige wetsch und gib nur din name iii (URL leer la). So weiss ich wer du bisch und chan der a anwtort schicke! Merciii 

Wettkampf

Zu dem Blog gits eigentlich nid viel z säge. Jede het so sini eigeni art und wiis sich uf en Wettkampf vorzbereite. S allerwichtigste devo isch natürlich s training an sich, aber über das wetti jetzt nid schribe (stat ja scho gnueg ide andere blogs).

Ca. 1 Monat voreme Wettkampf acht ich druf was ich esse. Ich han kein spezielle ernährigsplan oder so, aber ich achte druf dass ich eifach guets esse zu mier nimme.
1 Wuche vorem Wettkampf nimm ichs locker mitem training, was nöd heisst das ich nid trainiere. Ich achte druf dass ich kei verletzige inezie, nid zu hart trainiere so dass d muskle nid zu müed werdet. Ich konzentrier mich au druf ganzi Forme z mache, mini kondition z bhalte und was au sehr oft vergesse gat isch gnueg z schlafe!

Usserdem mach ich idere wuche nur sache wo mier spass machet i minere freizit. Also nüt was mich nervt ode so. Ich derf eifach psychisch nid belastet si vor irgenwelchne problem oder so. Kino, was go trinke, fein go esse,  en chillige abig diheime, wellnesse... all die sache helfet mier echli min kopf klar zkriege vorem Wettkampf.

Am Wettkampf selber gsets denns cho völlig anderst us; Mis herz pumpt stark, ich bin 100% glade und jede wo mier über de weg lauft kriegt en böse blick vo mier.. hahaha. Das ghör ich zu mindest vo dene wo mich gsend. Ich luege nid bewusst bös dri, ich bin eifach konzentriert und bi de sach.

Viel meinet ich bin nie nervös oder für mich segs eifach routine, aber das stimmt überhaupt nöd.
Jedesmal bin ich nervös, han es loch im buch und genau denn wenn ich dra chume han ich sgfühl dass ich go pipi mache muen. Echt jedesmal!

Ich erinnere mich denn selber dra a das was ich bis jetzt gmacht han, wie guet und intensiv ich mich vorbereitet han, wie diszipliniert ich mich a mini regle ghalte han, all de schweiss & gstank :), das geile gfühl nacheme intensive training, all die hürdene und die fails wo ich überwunde han, eifach alles gat mer denn dur de kopf und denn verwandle ich mich inen super sayajin!
Für die wo nid wüsset was das isch:



Nei ganz ehrlich, du muesch dich echli ufpeppe am Wettkampf. D nervosität druckt dich meistens echli abe und git der unsicherheit und mit irgendöppisem muesch degegewürke. Wichtig isch dass du dier nüt vormachsch debi. Blibe realistisch und glaub a das wo du trainiert hesch... also a das was du chasch! Du chasch nid 1mal im Monat trainiere, anen Wettkampf ga und denn meine, dass du mit de richtige istellig das scho schaffe chasch. Wie gseit s training isch immerna s aller wichtigste!

Und ja a all die wo sich vo de bessere athlete beidrucke lönd:
Die stinket alli! Und falls ich besser bin wie du und du dich vo mier beidrucke lasch, denn stink au ich! Echt, gang eifach a de Wettkampf und zeig dene schiris was DU chasch und nöd was du nöd chasch vergliche mit de anderne. Du gasch nid an Wettkampf zum de hero werde, sondern zum das z zeige was du güebt hesch und nid me!

Also train hard, denk postiv und zies dure! :)

Frage?

Trainingsplan

Ich bin sehr oft gfröget worde wie ich trainiere, was mach ich vor de wettkämpf, was nach de wettkämpf und überhaupt eifach wie mis training ufbaut isch.

Vor grosse Wettkämpf mach ich mer immer en Trainingsplan. Eigentlich han ich eine immer im Kopf aber für grossi Aläss (wie z.b. d Wushu WM) wet ich genau plane was ich wänn mache....

Wetsch me wüsse?

Motivation

Immer so e sach, oder? Amigs bisch voll motiviert und amigs würsch am liebste alles ligge la...

Bevor ich irgendwelchi bloggs über Wettkämpf, Trainingsphasene, Krafttraining etc. schribe, luegemer doch mal wie mier eus uf so sache chönd motiviere!

Min Kolleg, de wikipedia, meint dezue folgendes:
Motivation bezeichnet das auf emotionaler und neuronaler Aktivität (Aktivierung) beruhende Streben des Menschen nach Zielen oder wünschenswerten Zielobjekten. Motivation steigert die Handlungsbereitschaft und ist somit eine „Triebkraft“ für Verhalten.

Checksches?

Also uf Sami-dütsch heist das folgendes:
Motivation isch öpis wo du fühlsch und öpis wo dich dezue bringt wiiterzmache, öpis z erreiche.
Es hilft der i moment wos dier nöd eso guet gat, und chan dier i guete moment en astoss ge no me z erreiche als du scho erreicht hesch. Motivation chammer weder esse no trinke!

mis aller erste China-Training - TIANJIN 2005

Kensch sicher? Bisch fertig mit de schuel/usbildig, bisch wushu agfresse und denksch der; "Jetzt mueni uf china ga, mega hert trainiere, mega viel lerne und denn chum ich zrugg id schwitz, bin viel besser, chan so viel geili forme, han die geilste bewegige druf, mini sprüng sind u huere satt, chauf mer geili wushu equipements, han die neuste kleider vo Li Ning und vo mim geile neue wushu kleid wemmer erst gar nöd drübert rede...."

Naja, wenn du au das denkt hesch bi dim erste trainingsufenthalt z china oder das immerno no denksch, denn weisch garantiert dass das alles falsch isch.. und falls nöd denn da mini bestätigung: nüt vo dem isch itroffe... ussert die neuste kleider vo Li Ning und s geile wushu kleid :)

Ich verzelle vilicht zerst emal wie's mier ergange isch, s plane und so, wie s training gsi isch, s resultat nach dem ufenthalt und vilicht no so paar tipps für die wo so was au planet.

Was interessiert eu?

Saliiiiiii zäme...

So, das isch min blog.
Ich möcht eu allne echli s wushu nöcher bringe und alle wushu-cracks-freaks-lovers über die neuste "wushu trends" informiere. Ich wird au sehr oft agfröget wie ich trainiere und was ich so mache. Daher wird ich au vo mim training schribe und ab und zue mal au über öpis spezifisches schribe wie z.b. "wie de lotus kick mache?", "wie me dreie..etc".

Das ganze wird ich natürlich echli schmücke mit bilder und videos, demits nöd eso langwilig wird.

Ja das ganze schrib ich genau eso wie ichs verzelle wür.
Ich denke so verstönder mich am beste :)

Mer chan also säge das isch DE wushu blog uf züridütsch! :)

Bevor ich afange, würs mich schaurig wunderne über was ier gern lese würet.
Schribet mer am beste en kommentar da druf und ich wird versueche über all das z schribe.