Bevor ich irgendwelchi bloggs über Wettkämpf, Trainingsphasene, Krafttraining etc. schribe, luegemer doch mal wie mier eus uf so sache chönd motiviere!
Min Kolleg, de wikipedia, meint dezue folgendes:
Motivation bezeichnet das auf emotionaler und neuronaler Aktivität (Aktivierung) beruhende Streben des Menschen nach Zielen oder wünschenswerten Zielobjekten. Motivation steigert die Handlungsbereitschaft und ist somit eine „Triebkraft“ für Verhalten.
Checksches?
Also uf Sami-dütsch heist das folgendes:
Motivation isch öpis wo du fühlsch und öpis wo dich dezue bringt wiiterzmache, öpis z erreiche.
Es hilft der i moment wos dier nöd eso guet gat, und chan dier i guete moment en astoss ge no me z erreiche als du scho erreicht hesch. Motivation chammer weder esse no trinke!
Musik, Film, mit öperem es guets gspröch füehre, en Event luege, Biographie vo Vorbilder, en Wettkampf - all das sind sache vo mich motivieret und ich denke de meiste gats nöd viel anderst.
Leider isch de motivationsschub nur churz. Isch doch so,nöd?
- Hesch en film gse und denksch "ich muen jetzt voll gas ge"
- Losisch dis lieblingslied vom Jusin Biber oder so und denksch "jetzt chönt ich bäum usrisse, bin so was vo glade"
- hesch en Wettkampf i 3monet und denksch "ich trainiere so was vo hert" und am nechste tag tuet der alles weehh und du hesch kei lust
Es isch ja immer vo person zu person anderst aber ich han usegfunde, dass ich mich au sehr guet vo
negative sache motiviere chan .
Unter negative sache verstahn ich folgendes:
- en Wettkampf wo voll id hose gange isch
- es Ziel wo ich gmeint han ich hegs erreicht aber irgendöpis het mer en strich dur d rechnig gmacht
- Fehler (au im private lebe) wo mer gmacht het und bereut
- Verletzige - mues nöd nur physich am körper si, chan au e "mentali/geistigi" - verletzig si
- negativi Kritik
- schlechti Trainings
Wenn du dier das iredsch, denn muesch au bereit si was defür z mache! Am beste schribsch der alles uf en zettel uf und setzisch der e zit. Z.b bis endi Januar das und das... bis endi Februar das und das etc.
Du muesch aber 100% ehrlich mit dier selber si wenn du das ufschribsch und vor allem au realistisch.
Red mit lüt wo s änliche Problem gha hend wie du unds au gschafft hend.
Glaub nöd, dass es vo hüt uf morn gat! Genau darum isch wichtig, dass du dier Meilestei (Teilziel) chasch setze.
Tömmer doch das ganze mal ufs Wushu übersetze z.B. Sprüng.
Dies Ziel isches en 720er Sprung. Mis feedback: treum witer!
Blib zerst mal realistisch hesch das nöd verstande ?
Nimm der en 360 Sprung als Ziel.
De Sprung tuesch wieder in einzelni Teilziel zerlegge. Das chan öppe so usgse:
Darum muesch du dier selber ganz chlini zückerli ge - und vilicht trinksch au en Rimus nachem erreiche vo some Teilziel.
Nei ernsthaft, gönn dier was wenn du was erreicht hesch was dier freud macht. Au wenns idem bispil nur d landig isch oder sust was anderes.
So hesch irrsinnig freud am training, du gsesch dass das was du die ganz zit güebt hesch was bringt und du freusch dich umso me uf die nechst hürde wo dier vor einiger zit unerreichbar vor cho isch!
Für all das isches au vo vorteil wenn du s richtige umfeld hesch. Da spilet natürlich d lüt um dich ume e ganz wichtigi rolle. Din trainer, eltere, kollege etc.
Das ganze tönt nämlich scho eifach wemmer das eso list - Chlini teilziel mache und denn schaff ich scho alles. Nur je wiiter vorwärts du chumsch, desto schwieriger wirds ufzstige und genau dete bruchsch amigs unterstützig vo usse. Lüt wo dich mal wachrüttlet, dich motvieret, dier helfet oder wenns sie muen dier au mal e flättere gänd sind zu dem ziitpunkt herzlich willkomme!
Ach ja... die EINSTELLUNG
D istellig isch sehr eng verknüpft mit de motivation.
Wetsch du eifach e medallie ha und denn isch d welt für dich in ordnig?
Oder wetsch du in erster linie mit dier selber z fride si, mit dere Leistig wo du erbracht hesch und d medallie isch eifach no was schöns obedruf?
Die 2 frage trennet sich um Welte vonenand. Je nach dem weli frag uf dich zuetrifft trainiersch du eso wie es en Athlet macht oder eso wie's öpert macht wo eifach ufmerksamkeit brucht und immer gege abe luegt und nid nach ufe!
Geg abe luege - istellig
Das sind meistens de lüt wo eifach zfride sind mit dem was si bechömet. So lang sie eingermasse guet sind, lueget si gern gege abe und verglichet sich gern mit de schlechtere Athlete und nemet sich kei höchers ziiil. Amigs sinds au nöd ehrlich mit sich selber und tüend sich gern alles schön-rede!
Uf de alltag bezoge oder im bruefslebe, sind das die wo nie was neus usprobieret. Das was sie chönd, chönd sie einigermasse guet aber sind au nid perfekt i dem was sie machet. Sie kritisieret sehr sehr gern anderi lüt und stellet sich denn wenns ihne passt is rampeliecht.
Zuege dass sie was nöd chönd isch s letschte was sie mache würet - sie säget lieber "das interessiert mich sowieso nöd"...oder.... "das han ich eehhh nie wele".
Geg ufe luege - istellig
Das sind die lüt wo nie z fride sind mit sich selber. Sie suechet nöd nach dem was guet isch, sondern immer nach öpis wo si sich verbessere chönd. Sie lueget geg abe zum z realisiere was sie scho alles erreicht hend. Messe tüend si sich aber am liebste mit dene wo viel besser sind. Chum hends was erreicht schnappets sich scho es nächsts ziel und sie sind erst denn zfride wenn öpis perfekt isch und nöd wenns eifach öpis chönd.
Im bruefslebe oder im alltag sind das die lüt wo immer gern neui herusforderige hend und gern für überraschige z ha sind. Anderst ume sinds i gwüssne sache eher echli stur, will sie eifach ires ziel hend, d route wüsset und eifach ehrgizit dere route nafahret. Natürlich chunts no uf de charakter druf ahh, aber die istellig prägt eigentlich de charakter scho ziemlich!
Es spilt kei rolle ob du eis uf profi mache wetsch oder eifach als fun - du sötsch geg ufe luege und versueche alles besser z mache. Das motiviert au im training sehr !!!
Was meinsch dezue?
Kommentar?
Tuen "Name/URL" uswähle wenn du din Name azeige wetsch und gib nur din name iii (URL leer la). So weiss ich wer du bisch und chan der a anwtort schicke! Merciii
Brrrrrrutal!
AntwortenLöschenUnd's geile dra isch, mer chan die Vorgehenswies uf so ziemlich alles awenede :D Hammer!
*awende
Löschen