mis aller erste China-Training - TIANJIN 2005

Kensch sicher? Bisch fertig mit de schuel/usbildig, bisch wushu agfresse und denksch der; "Jetzt mueni uf china ga, mega hert trainiere, mega viel lerne und denn chum ich zrugg id schwitz, bin viel besser, chan so viel geili forme, han die geilste bewegige druf, mini sprüng sind u huere satt, chauf mer geili wushu equipements, han die neuste kleider vo Li Ning und vo mim geile neue wushu kleid wemmer erst gar nöd drübert rede...."

Naja, wenn du au das denkt hesch bi dim erste trainingsufenthalt z china oder das immerno no denksch, denn weisch garantiert dass das alles falsch isch.. und falls nöd denn da mini bestätigung: nüt vo dem isch itroffe... ussert die neuste kleider vo Li Ning und s geile wushu kleid :)

Ich verzelle vilicht zerst emal wie's mier ergange isch, s plane und so, wie s training gsi isch, s resultat nach dem ufenthalt und vilicht no so paar tipps für die wo so was au planet.

s'Plane:
Da das min aller ersti trainigsufenthalt gsi isch, han ich kei grossi aforderige gha. ich han eifach wele uf china ga und mit irgendwelchne chinese trainiere. Uf gar kein fall han ich wele inere schuel ga wo extra für uslender gmacht worde isch - ja ich han wele wüsse wie die so trainieret und wie die die sache mache chönd wo ich nöd chan. Also da ich keis bitzeli chinesisch han chöne, kei ahnig vo china gha han, null kontäkt gha han und au sust echli grüen hinder de ohre gsi bin (hallo ich bin dete 20gi gsi!!!! stellet eu das mal vor) han ich mich halt vo mine 2 trainer informiere la.

Also zerst hets gheisse ich göchi uf Foshan (Süd China) zunere Chin Woo Schuel. Also was isch s erste wod machsch? Ja genau, du rensch in nechste büecher lade und chaufsch der e "Chinesese for beginner (Cantonese)" CD.  Die cd isch de hit, die han ich hüt no... es chlises büechli isch au no debi gsi. Somit han ich mini erste kantonesische wörter glernt;
Hallo, wie gats, spital, taxi, danke, bitte, guet und dier, milch, wasser, schlafe, dusche, nei, ja.

1 monat vorher krieg ich mis flugticket - destination: BEIJING. öhhhmm isch das nöd im norde? Ja Sami, du gasch nemlich uf Tianjin,.. isch glaubs besser für dich. Ahh ok geil spilt ja kei Rolle, chan ja bitz chinesisches. Näääee ebe nöd die redet dete nemlich mandarin...!

Ok.
Also demfall: Es gat uf Tianjin!

Packe:
Natürlich han ich viel zviel mitgno. Nebst all dene sinnlose kleider wo ich mitgno han, han ich au no ganz viel anderi sinnlosi sache (im nachhinein sinnlos) mitgno. Wie z.b. 4 trainingsschueh, x-trainings tshirts, mobile dvd-player, x-büecher über china und mis ganze badzimmer, es voltaren set, jenes salbene und spray. Ja debi het ich nur 2 paar trainingshose/shirts brucht, paar unterwösch und de reste het ich dete chöne chaufe.

Beijing International Airport - ok und jetzt wo ane?
Ja vom flug selber gits nöt viel z verzelle. Acho in Peking han ich zerst mal kei ahnig gha wo ane. Da chunsch usem flughafe use, nach de pass kontrolle, und denn überumplet dich eifach mal paar taxi fahrer: Hi sir, Beijing City? Luuckyy luckyy ? Shopping? good hotel?

Ich han gwüsst, ich muen de Bus nach Tianjin City ne. Ok .. de bus.. mhhh, irgendwo han ich denn es bus-zeiche gse und bin dem gfolgt. Ich han no en zettel uf chinesisch debi gha wo so was wie "Ich wet uf Tianjin City" gstande isch. also isches gar nod eso schlimm gsi eigentlich. Trotzdem, han ich natürlich die ganz zit angst gha, dass ich irgendwo falsch igstige bin oder so.

Nigga tschegga - was?
Nach öppe 3h Bus fahre bin ich abgholt worde vo irgendeinere wo nur "Hello" het chöne säge und die ganz zit glachet het - aber ganz e lustigi gsi. Die Frau het mich zu de chunt woo schuel in tianjin gfahre. Die schuel isch ca. 1h entfernt vo de Stadt gsi - also ziemlich wiit weg. Wo ich ide schuel acho bin sinds grad am trainiere gsi dusse: Sanda, Taiji, Wushu, Kontion und Kraft.

Also bini zerst eifach mal paff gsi und han wahrschinlich en riiise smile druf gha. Nachher hends mich zum schuelleiter bracht, dem hani s geld ge für de ganzi monet (training, esse und schlafe) - in USD... Bin mer vorcho wie en gangster :) Denn isches drum gange mis training z bestimme.
Wieviel mal am tag, ide wuche und was ich so lerne will. Da hends eini gholt wo echli me english het chöne und die het alles übersetzt. Da zeigt die mitem finger uf mich und seit: “ta nigga niigga......“ und ich denk mer ohmmm hallo??? Ja viel spöter (öppe 2 wuche spöter) han ich denn use gfunde, dass mer das so seit wemmer nacheme wort suecht oder so. Also anstatt “Ehmm.. Oohmm“ saget chinese “nigga“ und “das da“ sagets “tschega“.

DAS Bett 
Da dezue mueni glaubs nid viel schribe. 

Ich bin so was vo schlecht 
Am nechste tag hani grad chöne mit de Gruppe trainiere. D gruppe isch gmischt gsi: jugendlichi und paar chind. Wie immer hemmer zerst agfange mit de grundschuel. Die sache wo du am beste chasch, chömed dier plötzlich soo schlecht vor! Ok, chan aber si will s nid de besti tag gsi isch... Luegemer wiiter. Spöter hemmer denn echli sprüng gmacht (das isch mini schwächi gsi) , also isches ok gsi. Nacher forme. Dete hends zerst wele gse wie ich mich bewege und so. Also han ich 1 ganzi form müesse zeige. Nachher hani nomal derfe afange und nur scho bi de aller erste bewegig hends mich korrigiert und nachher bi jedere witere au no. Zu dem ziit punkt isch das nöd grad motivierend gsi. Und jede tag hesch immer die gliche bewegige nomal und nomal müesse mache, obwohl ich eigentlich neus han wele lerne. Dete hani zum erste mal igse, dass ich eigentlich e pfiffe bin und nüt chan. 

Ich bin no schlechter als vorher 
Ja mer sötti doch meine dass nach 2 wuche echli was glernt hesch und e bitz fortschritt gmacht hesch. Schliesslich han ich 2mal pro tag trainiert gha und das 5mal ide Wuche. nöööö... han nix vo dem gmerkt. Ganz im geteil ich han sgfühl gha ich bin viel schlechter worde. Jede tag het mer alles we gmacht, ich bin immer müed gsi und han au kei gueti luune gha. D lust zum trainiere und vorwärtszcho isch ziemlich gring gsi - ich han gar kei fortschritt gmacht.

Eigentlich han ich nix neus glernt 
Ide letschte Wuche hani mer no denkt: Eigentlich han ich doch wele neui Sache lerne? Besser werde und so? Nüt vo dem isch passiert!  Und für das hani extra geld spart und bin uf china cho?

Ich wet hei! 
Zum schluss han ich mich mega gfreut wieder heizcho. Ich han mer gseit gha "ich mache nie meh eso en trainingsufenthalt. Du bisch die ganz ziit allei, wenigi chönd english, würklich kollege chasch au nid mache, use ga hani au nid chöne will d schuel abseits vo allem gsi isch und und und.. nei es isch kein coole ufenthalt gsi.

Rückblick
De blog tönt eso als wür ich so was nie wieder mache, oder? Als wers e mega schlechti erfahrig, oder?
Zu dem zitpunkt isch das au eso gsi, das chani eu sage! Im nachhinein het mich das sooo viel glernt im Bezug uf mini Istellig, Erwartige, Selbstvertraue, Stärkene/Schwächene und und und...

Ich han echt sgfühl gha ich chan eifach so uf China ga und chume als superheld zrugg....
Ich han gmeint dass ich die sache wo ich nöd chan, plötzlich wird chöne nur will ich z China bin....
Ich han gmeint ich chönt mich selber motoviere die sache z mache wo ich nöd so gern mache nur will ich z China bin...
Ich han gmeint ich weri bereit mit de chinese z trainiere nur will mer paar ide schwitz gseit hend "Du chöntsch mal guet werde"....

All die Sache wo ich während dem 1monatige Training z china glernt han, all die die üebige wo ich gar nöd gern gha han und das ewige wiederhole und nomal und nomal het mer erst ca. 1/2 jahr spöter ghulfe, wo ich denn selber gmerkt han "wow... jetzt merk ich selber en fortschritt." und erst denn han ich eigentlich gschnallt, dass es nöd drum gat uf china zga was z lerne, zrugg zcho und denn sage "so ich chans jetzt", sondern dass es darum gat sich ständig z verbessere und usezfinde was chan ich nonig - wie chan ichs lerne - und wie steigere ich mich au wenn ichs chan. 

Es training in china macht us dier NIX! Und wend das nöd begriffe hesch denn muesch gar nüme wiiterlese....

Es chunt immer druf ahh was du wetsch? Wetsch du eifach us spass mal uf china ga und eifach erlebe wie es so isch mit dene z trainiere? Wetsch du was bestimmts lerne? Oder wetsch du richtig profi ga und a wettkämf mittmache und so?

Das sind die aller ersti frage wo du dier stelle muesch. S wichtigste debi isch realistisch z si und dich selber nid alüge. Z.b du gasch go studiere, hesch e fründin, schaffsch nebet bi no, gasch viel in usgang und du bisch immer mit dinee jungs/chics unterwegs - klar wer schono geil en wushu star z werde nebst all dem, aber bisch du bereit so viel zit/geld/geduld z investiere? 
Bisch du bereit die meisti vo dinere freizit für de sport z opfere? 
Bisch bereit für de sport din lebensstil azpasse?  
Bisch bereit z kämpfe wenns mal bergab gat?
Gisch dich z friede mit dem wod chasch oder strebsch die ganz ziit nach was besseres?

Es git no ganz viel frage, aber mit dene Frage chasch dich scho mal sehr guet kategorisiere ("for fun", "wet was erreiche", "mal luege wies chunt" etc.)

Ich meine letschtendlich machsch du das ja scho die ganz zit im Lebe - du entscheidisch was dier wichtig isch und worin du investiere wetsch. Denn mach das au mitem sport, wenn du dier wünschisch guet z werde!

Letschtendlich muen ich säge, das es training z china nöd hilft, wenn du nid de richtig kopf defür hesch. Bevor du go trainere gasch dete, muesch du dich scho intensiv vorbereiete. D istellig "z china gat das denn scho"... obwohl du's diheime nie hesch chöne isch völlig falsch und wird nie itreffe!

Ich bin jetzt scho fast jedes jahr wieder uf china gange to trainiere, aber natürlich isch s niveau im verglich zu 2005 völlig anderst. Ich gahne dete ane zum mich uf en wettkampf vorbereite und alles z perfektioniere was ich chan. Ich wet usefinde wie ich am beste traniere chan und nüme das lerne was eifach geil usgseht oder so. Ich bin unzfride wenn de trainier nüt seit und freu mich gewaltig wenn er seit "das machsch jetzt 10mal".. no me freu ich mich wenns heist "ok das muesch nüme so oft mache, das schasch jetzt - gömmer en schritt wiiter".
Ich lose uf de trainere und nimme jede tip ahh und versuchs umsetze bis es klappt!

Das isch das was spass macht - hert für öppis schaffe und nachher no wiiter ufeluege!

Ja echli en zu lange blog? Was meinet ier?
Han vilicht echli viel theme gmischt :( aber das isch das was ich grad so im kopf han.
Gits öpis wo ier no gneuaer wüsse wend?

Ich wird sicher no en blog über min trainingsufenthlat in shanghai schribe (5 monet, 1mal bi de profi-mannschaft).

Feedback? hender so was au erlebt?