Wuche drü - letschti blög

Eigentlich ha ich dasmal nöd all zu viel z verzelle. Im Training lauft alles super. Zwei ganzi forme pro training hend zum normale tagesablauf ghört. Viel krafttraining (eigentlich nur bei) hani jede tag müsse mache.

Wenn d so e lengeri ziit so intensiv trainiersch, den wachsisch scho zäme, au wenns vilicht sprachlich nöd ganz eifach isch - schoggi verschenke und de trainer es Schwiiizer sackmesser ge ghört eifach dezue und fördert beziehig (so lauft das da einfach!).

Eim wo mer sehr ghulfe het (extra abig sessions und so..) hani so en chline elektronische translator gschenkt. Ich ha de mal vor paar Jahre da in china kauft ide hoffnig chinesisch z lerne....Aber es het nüt gnützt :) er het ufjedefall mega freud dra gha und het gmeint, dass sis english nechstmal viel besser wird sie.

P.s. mis chinesisch isch imfall au besser worde. Paar neui wörter glernt und so... Mal luege obi das nöd wieder vergisse :)

Mini letschti shopping tour hani au gmacht und wie immer hani sehr viel g'ässe.

Die letschte zwei äbige bini zum esse iglade worde und han mich vo ihne verabschiedet.
Scho no funny...mal abgse devo, dass ich mich da für en Wettkampf vorbereite...Vor paar jahr hett ich die letschte 2 äbige anderst verbracht: kei schlaf, party ohne Ende...und trotzdem viel gässe :)

Was ganz speziell gsi isch isch s esse mit de athlete wo scho ufghört hend mit wushu. Die sind alli mit Frau und Kind cho, kei Alkohol und so. Ja au mit ihne wer das vor paar jahre anderst gsi. Aber es isch lustig gsi mit ihne die erfahrige usztusche wo sie so gsammlet hend und so. Lustigi gschichtli, woni da nöd chan schribe :)

Hüt, samstig 22.10.16 flügi erst am 23:55 zrugg id schwitz. Viel vo de athlete blibet über s weekend im campus. So hends mich gfröget obi lust han bi ihne ime zimmer hotpot z esse...klaro!!! Also mitem ganze gepäck zu ihne gange und denn simmer inen local märt gange go gmües, tofu, fleisch, scharfi sauce etc. go poste. Sehr es lustigs aller-letschts esse gsi! Kuum het eine im Gang s esse gschmöckt sinds grad i das zimmer cho (die hend so en mobile hotpot) und so isches also dezue cho, dass ich fast alli doch nomal gse han.

Jaja ich weiss ich rede viel vom esse und chan nid ufhöre aber das ghört halt nun mal dezue zum training und isch amigs für mich wie e belohnig gsi oder so...kei ahnig.

Letschendlich han ich e geili ziit da gha, viel glernt, viel chöne profitiere au für Zukunft. Viel neui kontäkt chöne chnüpfe und ich ha 3 wuche mega spass dra gha nüt anderes müesse z mache ussert trainiere. Ja fast so viel spass gha, dass ich de stress ide schwitz scho fast bitzeli vermisse.

Ich freu mich jetzt zrugg z cho und wieder i mimere umgebig z si. Ich freu mich au uf de letschti fiinschliff ide schwitz bevors wieder ab nach China gat zum Wettkampf (15.11.2016)....

88

Spital, 1:26min, Lob - Wuche zwoi

Also muesch kei angst ha - de Titel hani so usgwählt, demit DU au druf klicksch. Isch doch wie bi 20min.ch - dramatische titel und scho klicktet alli druf....Ok so dramatisch isch er jetzt au nöd....

Ich bin also würklich im Spital gsi! Woni z China acho bin und agfange han trainiere hani en liechte usschlag becho am rächte Arm - han mer nix debi denkt und wiitergmacht irgendwenn hets afa fest brenne und jenes blatere sind entstande (wääääh so grusig, warum verzellsch du so was? - den klick weg und gang zrugg uf 20min.ch) und wieder han ich denkt scheiss drauf. Aber irgendwenn isches sehr unagnehm worde..vorallem wills au de arm isch womit ich mitem säbel umewirble. So bin ich ine apothek gange und han eifach schnell mis libli glupft und de usschlag zeiget. Sie het mer den irgend e salbi ge (wahrschinlich isches zaahpasta gsi) und es het au nach 2 täg nüt gnützt, nei es isch sogar schlimmer worde. So isch, klein Sami, es Spital go ufsueche wo d lüt english chönd. Das isch ganz easy gsi  dank smartshanghai.com ! Faste alli hend english chönne - ich bin so froh gsi hend mich alli verstande und hend mer au chöne säge was ich ha. D ärtzin selber het aber kei english chöne...alli english sprechende ärzt sind usbueched und sie het müsse ispringe (uslender und ihri problem...tsss). So isch de Abteiligsleiter (wo 28i isch) go übersetze cho - perfekts english. Isch no funny gsi er het mal sanda trainiert und so hemmer au sust viel gschwätzt. Zerst hani müesse en bluetprobe abge zum checke obi irgend e infektion ha oder so. Alles Oki. Letschtenendes isches vermuetlich vom viele training (schweiss und riibig vom arm zum körper und d luft wo änderst isch) - sie hend mer tablette und e salbi ge. 4 Tag später tuto bene. Alles weg. Ahja...öppis isch ganz lustig gsi. Wo ich d medis becho han seit er mier “ I suggest you do not drink till it's ok" ich so "but I have to drink" er so "well you need to know it" ich so "sorry but I am practicing every day for almost 6hrs... I need to drink something!" Er so " Ohh sorry I mean not to drink any alcohol" and mier hend alli glachet! :)

Die Wuche hani mit ganzi agfange (wushu-analphabete: das heisst mer zeigt quasi die ganz form so wie ame wettkampf..wie en probe). Ja und ich hab Sust immer so zwüschet 1:40 und 1:45min gha und dasmal, obwohl ich sgfühl ha ich heg me bewegige ide form hani nur 1:26min - enweder lits dra, dass ich weniger stops han und alles flüssiger isch oder am liechte säbel...es lit garantiert nöd a min bizeps (Insider!) :)
Nei es isch guet ich bin happy mit de leistig. S brenne ide bei gspür ich erst bim zweite ganze und  öppert erst nach de zweite linie - sicher e guets zeiche !

De Trainer woni han isch eigentlich ganz en spezielle. Er hockt uf sim leder stuehl, trinkt sin tee, raucht sini zigi und motzt echli umenand. Mier het er oft gseit was ich falsch mache oder nöd guet. Z.b. “daohua“ mitem säbel hinderem rugge wirble - ich benutze wenig d hüpft und bin zu lieb zum säbel - ich söll de säbel bi jedere daohua quasi zerstöre. Und ich merke tatsächlich en unterschied aber muen mich jedesmal konzentriere, demit ich das chan abrüefe. Gege endi vo dere wuche het er mich mehrmals globt. Er het mit sim finger uf sini stirn klopfet und mier s OK zeiche gmacht = du checksch schnell oder so und eimal het er alli zemegschisse uf chinesisch und paar mal min Name erwähnt. Woni nachher eine gfröget was er gseit hegi, het er gseit, dass ich mich me astrenge als d profis obwohl ich nöd devo läbe und jedes feedback probiere umzsetze...während sie alli echli fuul seget. Natürlich mega schön das z ghöre, aber ja wenn ich s lebe lang nur das wür mache was sie au machet, wär ich garantiert nöd so motiviert wie sie.

Lob isch immer geil, wär het das scho nöd gern? Grad wemmer sich mega astrengt für öppis. Aber ich sueche immerno nach fehler/verbesserige und ich liebs wenni wieder was muen verbessere. Krank gell? ;)

Ach ja, no was für wushu lüt: mega interessant. Fast alli nanquan athlete in China mischet jetzt au no chli Wing Chun technike i ihri form dri. Me het das au scho ade China Nationals 2016 gse. Findi no cool. Und allgemein wird alles echli traditioneller sägi jetzt mal. Fancy moves gits immerno und sind au ok, aber das ganze nimmt scho echli e anderi richtig ah so im verglich zu de letscht paar Jahre. Im Changquan isches eifach eso, dass es viel viel viel weniger dance bewegige git sondern me “kampf technike“ - findi uf jedefall cool. Vor es paar jahre het ich die veränderig nöd so cool gfunde. Aber ich muen säge eso traditionells züg mitem usdruck und kraft vome athlet wo moderns wushu macht - isch mega idrücklich!!!!

P.S letschti isch eso en chline pupf mit eus am trainiere gsi. Ich ha scho vieles gse und mich beidruckt nüme jede wo was chan.de isch vilicht 10 oder 11 gsi - shit de het en usdruck, kraft gha...echt krass....und e mega präsenz! Ich bin froh bin ich i dere Generation und nöd ide nächsti oder übernächste wo chunt :=)

Usserdem bin ich letschti ime Park gsi go XingYiQuan lerne. Interessanti form, gfallt mer. Mal luege wie das wiitergat.

No knapp 1 Wuche denn zrugg in alltag ide Schwiiiz. Ide letschte wuche wirdi wiiterhin vollgas ge und probiere so viel verbesserigsvorschläg wie nur möglich mitzne, demit ich das ide schwiz witer vertüfe chan.

Ach ja, s esse isch immerno u huere geil!

Wuche Eis

Jep und scho isch bald 1 vo 3 wuche ume ich wet eu nöd langwile mit allne details aber ich probiere jetzt glich alles chronologisch (beläse?) ufzfüehre.

Kids vo kei Kids me sind
Am mäntig hät mis erste training agfange. De Trainer hät mich miteme lächle und eme handschüttle begrüesst (das heisst imfall was, de macht sust kein wann!). Alli wo quasi no profis gsi sind hend ufghört und hend jetzt irgendwo idere sport schuel en job oder schafften sust irgendwo als wushu trainer oder bim jacky chan stunt team. Es paar athlete hani no kennt und alli andere hani nüme wiedererkennt. Später isch mer den ufgfalle, dass mer die gsichter ebe doch bekannt vorchömet und ich bin rächt paff gsi was so us dene worde isch. Vo kids wo immer seich gmacht hend wenn de lehrer nüme ume gsi isch, sind starki athlete und gueti, netti mänsche worde (so han ichs ufjedefall empfunde). Ok ich bin ja erst no bim Mäntig also scheifi dasmal nüme so krass ab. Anyway...Ich bin guet ufgno worde und han mich wie diheime gfühlt (2007,2009,2011,2013 au da gsi) - was mental Super isch zum Gas ge!

Hello Smi
Ebe es hät also en Generationswechsel bi de Athlete und mit de einte hani no guete kontakt, anderi hani lang nüm gse. Ufjedefall isch eine vo dene wo ich lang nüme gse ha jetzt anschienend Kinder trainer (jep die werdet gschlage!) Und de lauft er zu mier ane seit “hello smi“ - isch kein tippfehler. Er chan mitllerwiile es paar wörter english und mier hend eus echli ustuscht, was er so macht, warum ich da bin etc. Am schluss hät er mier no es paar netti sache gseit und denn isch er wieder es kind am zämeschisse gsi.

Tape, schoner, Kinesiotape, iiisbütel
Ich bin ja scho immer impressed gsi ab de leistig vo dene chinese, klar..trainieret au jede Tag und hend sust kei sorge ussert weles videogame sie hüt abig spielet und so, aber live isches ebe scho no krass. Und glich isch mer aber erst dasmal so härt ufgfalle wie kaputt die scho sind. All die wo quasi guet sind hend me schoner und tapes a irem körper als ich ime ganze jahr bruche - da bini also no u huere froh chan ich das was ich mache ohne grossi verletzige .

Hao ok-la no need to change
Irgendwenn afangs wuche (sorry timeline irgendwie verrutscht) han ich de troffe wo mier sehr viel bibracht het (unter anderem au geduld im sport..ziemlich s einzige wo ich geduld han) de XieFuYan en ex profi wo ich sit 2007 kenne. Er schafft jetzt quasi im sekretariat vo dere sportschuel, isch verhüratet und happy-la. E fetti umarmig und denn het er gseit ich soll ihm mal mini form zeige....Am schluss seit er, nachdem ich ihn fröge obs guet usgseht “is ok la, no need to change..just faster“ cool nöd?

Am nächste Tag isch er wieder cho und seit “ey sami“ weisch er seit sami und nöd smi “i change your taolu little bit..look“ und es isch nöd a little bit gsi aber ich han sini apassige sehr gern agno. Was ich sehr gschetzt ha isch s feedback uf de wettkampf grichtet. Ich han z.b paar cooli moves gha wo er gseit het sie sind cool aber ich sölls ine andere richtig mache, demits d schiedsrichter beidruckt oder wie ich me gschwindigkeit chan usehole mit ganz chline tipps...aber die sind mer jetzt Gold Wert! Ufjedefall hets ihn gfreut, das ich immerno so fit dra bin und mich hets gfreut ihn wieder zgse!

Massahi, Massahi...
En guete Kolleg vo mier wo lang in Shanghai glebt het, hät so Ört wie “people square“, quasi d bahnhofstrass vo shanghai, vermiided, will eifach All die Touriste dete sind und mer als uslender immer wieder agsproche wird irgend en scheiss z kaufe. Ich persönlich finde das au nöd geil und aber mich hets nie würklich gstört...aber dasmal hets mich richtig gnervt. Ich weiss nöd ob das isch will ich so oft da gsi bin oder eifach will scho zu ü30 ghöre (Shit!) aber ich mag das eifach nüme. Du laufsch ganz friedlich mit dim feine bubble tea ume und denn chömets mit irer scheiss karte mit uhre und schueh druf und säget dier “hello, shoes, watches, dvd, bags....hello Sir, what Do you want? Ladies ? Massahi, massahi? SixDVD?“ - läck es het mich nie so fest gnervt wie das mal - Opa Sami.

Ich chönt no so viel verzelle, wie dass ich jede Tag viel z viel esse und es isch soo fein! Oder dass s esse da so guet schmöckt...oder dass es so viel uswahl an geilem esse git oder dass du überall zu jederziit u huere geils esse bechunsch mitere riise uswahl und dass zu rund um die Uhr!

Ok.

In Paris scho z China!!!

Fritig abig, 30.9 bin ich uf China gfloge.
De Flug isch über Paris gange und wie mer sich das in ZH Flughafe so gewöhnt isch, isch alles guet gange.

In Paris acho, bini den uf de A380er (für analphabete...das isch s doppelstöckige grosse flugi)....ich bin eigentlich ganz happy gsi bis ich as gate acho bin, wo alli mensche eigentlich 1 Reihe machet und astönd....Nur d Chinese nöd und dummerwis ISCH DE GANZI FLÜGER VOLLE VO CHINESE!!

Mich het das verhalte was das abelangt scho immer gnervt...entweder hets einfach jetzt sis Limit erreicht oder ich wirde alt. Ich stahne ganz normal ah und den wet so en chines a mier verbi -> ich hab nur 1 Ziel gha; er derf nöd vor mier im Flüger si und ich glaube das het ihn ziemlich gnervt. Mega kindisch gell?

Ufjedefall hät mis hirni scho in Paris uf China modus müesse umstelle was sehr schwierig gsi isch.

Ich ha eigentlich en feistersitzplatz oder eine am Rand gwünscht, aber leider hab ich müsse ide mitti sitze - mich hets scho ziemlich agschisse, aber den im flüger hani ganz netti nachbare gha. De links vo mier isch en alte Ma gsi wo eigentlich ganz ruig gsi isch. De rechts vo mier isch en bisnes ma gsi wo in barcelona es Meeting gha het und echli mit mier gschwätzt het..nöd zu viel und au nid z wenig.

Chum abgfloge hani abchecked was für movies es so hät und mer grad e playlist gmacht....drüü mal chasch rate wie mini playlist usgse het. Ich ha denkt ich suech mer dasmal film mit echli me gschicht und sinn als sust, mit ere message wo Vermittlet mit, mit eme bezug zu de realität.... ja genau CIVIL WAR, DEADPOOL, IRONMAN 3, Batman Vs. Superman - Überrascht? ;)

Letscht endlich hets aber nid mal für 1 Film glanget und ich bin grad igschlafe und erst verwachet wos wieder z morge ge het. 1h spöter simmer glandet. Vom Flughafe grad is Hotel. Mis zimmer isch ganz ok.

Also ich bin im Shanghai guet acho und alles isch tiptop. Am Mäntig namittag gats los mitem Training!

Cya