Glücklich

Zwei mal de 6.Platz (diplomrang), bro was wetsch no me? Und glich juckts echli hine am rugge.

Luegemer mal d fakte ah. Es isch nur scho uhuere krass überhaupt anere WM unter die beste 8 z si....Ok das isch jetzt lang her und bin iglade worde zu dem wettkampf wo ebe nur die beste 8 mitmache derfet.

Es ziel hani scho gha...und zwar nöd 8. werde und das hani in beidne kategorie gschafft. Dass ich denn no 6 wird (also besser als ade WM wo ich 7 worde bin) isch huere geil. Ich freu mich ja richtig, aber.... Ich han halt einfach nie gnueg, sorry :)

Es isch ebe scho möglich no besser z werde, dass zgse git mer natürlich echli power no wiiterzga - das mein ich mit es juckt. Ich glaube mich wirds eh immer jucke, bis ich gsehne : ok das isch mini limite und jetzt isch fertig.

Was ich merke isch dass so en wettkampf uf some höche Niveau mier mega guet tuet ... innerlich *ims herz*
Schön sind natürlich immer die feedbacks vo de pros, dasmal aber au feedback vo trainer vo anderne natione becho, das bedütet mier au sehr viel und Zeigt mier au echli, dass ich mer bi dene scho en name gmacht han... usnahmswis mal nöd als clown :)

Ich hoffe sehr, dass ich mit all dem woni mache au paar anderi us de schwitz wo meistens eher zrugghaltend, unsicher, introvertiert, schwach ja ab und zue au kei muet händ und kei risike wänd iga, chan motiviere und ufzeige, dass es ebe au für e chlini schwitz möglich isch so wiit füre zcho - mer muess es nur wele, denn plane und denn schaffe als gäbs nüt anderes! Ich bin weder es talent, no hani en trainer wo mich täglich unterstützt. au verbring ich mis läbe nöd nur mit wushu (leider!) - s einzige woni han isch en sturre Kopf und en starke wille!

Ok gnueg gesülze. hani scho erwähnt, dass ich scho lang kei Chips und Cola gha han?

Danke für alles! :)

Alles wieder gut!

Tag zwei isch scho viel besser und het fast alli problem glöst:
- mis Gepäck isch acho
- ich derf tatsächlich au im nangun starte
- ha mer en neue nangun (stock) kauft

S einzige was ich no kläre muen isch de genaui ablauf vom turnier - isch mier persönlich aber egal. Bin jederziit abrufbereit :)

Hüt hani viel gschlafe und hoffe das de jetlag nüme so schlimm isch. Vo gester uf hüt hani hebe nid eso guet chöne schlafe... arme Sami.

Am abig hemmer s erste training gha. Paar helftene und sprüng gmacht und das langet scho. Morn gits den nomal es training und no d eröffnigszeremonie.

Die wuet und unzfrideheit vo gester isch scho wieder weg. Das isch schön!

Sust isch d armosphäre bis jetzt sehr cool.... und es stinkt nöd so wie andere WM wo au no d sanda lüt debi sind...hahaha sorry Sanda people, aber das isch mer grad ufgfalle :)

Das isch mal alles bis jetzt. Bis Morn!

Be besti Tag ever!

So, hüt gats los ...ab zum Taolu World Cup in China.

Vo Züri bini uf Frankfurt gfloge und vo Frankfurt nach Beijing und da fangt de schönsti Tag ahh:

Kurz vor de landig hemmer müesse ganz vorne vom flugi sitze, will mier grad de nechsti Flug gha hend. Chum glandet hemmer den gstresst aber wenn ebe 1000000 anderi chinese au nomal dur passkontrolle müend und die 10000000 chinese au nomal dur gepäckkontrolle müend, denn isches unmöglich en aschlussflug wo inere Stund losgat zverwütsche - was hend die sich eigentlich debi denkt so verbindige azbüte? Egal, ich bin erwachse und weiss wie demit umga....seit mer.

Irgendwen wo mer ganz vorne gsi sind bi de passkontrolle seit die sehr netti und dienstleistigsorientierti zollbeamtin “NO“ - das het scho alles gseit. Für die wo nöd wüsste was das heisst; e antwort “NO“ bedütet, egal was du machsch, dass du das nöd wirsch mache.I mim Fall heisst also “NO“ = “sie entschuldiget sie mich, leider gottes hend sie ire Flug verpasst das tuet mer sehr leid obwohl ich so stur und dumm driluege. Ich weiss es sind viel agstande und es isch so dumm vo de airline so was azbüte. Bitte begäbet sie sich in 4. Stock ufe und ich bin zueversichtlich dass mer ihne schnellst möglich en nächste flug organisiere wird“ 

So und mit dem “NO“ simmer den zum vierte stock ufe und sind vo eim schalter zum nächste gschickt worde. Echt mühsam gsi. Am schluss simmer ame Schalter gsi wo en chines perfekt englisch het chöne, eus tickets bsorgt het und wirklich nett gsi isch!!!

Also 4 Stund warte uf de nächsti Flug und s Gepäck wird mit dem Flüger mitga.....händs gseit.

In Fuzhou acho sägi eu jetzt “NO“  - Weisch was das heisst? Genau...mis Gepäck isch ebe nöd acho! Easy ich ha ja nüt wichtigs det drin ussert mini trainings und wettkampfkleider, unterwösch, dusch sache und so. Fröhlich und mit unheimlich viel positivem chi (inneri kraft) begib ich mich also zum lost and found schalter (so en chline scheiss ecke im flughafe). Zeig ihne es foti vo mim Gepäck und gib ihne de coupon vom fehlende Gepäck ab. Denn sagets mer dass sie im system nöd gsend wo mis Gepäck isch und sie mier nöd chönd säge wenns achunt. Sie müend mal nach peking und frankfurt telefoniere und meldet sich den bi mier. Herrlich nöd? I dem momänt bini sehr happy gsi!

Spass beiseite... isch en müehsame trip gsi und ich überläb das scho ohni gepäck. Isch einfach mega müehsam.

Vom Flughafe us simmer sicher 1h mitem car richtig “no-where“ gfahre, aber s hotel isch echt delüx!😊
Irgendwo ufeme hügel hets so es resort und dete simmer...Echt cool. D wettkampfhalle seg aber 30min entfernt mitem Car (ich ha gwüsst dass es irgend en hacke het)....

Wo mer acho sind hämmer euse badge, hotel Schlüssel und guetschi für s esse übercho. Dezue hemmer no es heftli becho mitem programm druff.
Ufem badge hets au chlidruckt s Programm druf gha..gemäss dem bini am 20.11 am abig dra..und jetzt chunts...Aber gemäss dem programmheftli bini am 19.11 am morge dra. Kei ahnig wenn ich dra bin. Aber hey ich hau no eine druf: es isch ja nöd so, dass mer en scheiss langi reis gha hend und mis Gepäck nöd acho isch... nei, gar nöd!!!! ufem Programm mach ich anschienend au Nangun (stock), isch ja nöd so, dass ich mich weigere wür a some alasss i zwei Kategorie z starte.. nur hani nüt devo gwüsst... und vor allem hani ja immer en stock debi im Rucksack....So für alle Fälle!

So, morn mueni den all das zeugs abkläre. Anhand vo de Art und wis wie ich schribe (artikuliere? Beläse?) merkt mer dasi apisst bin, ich probiers aber echt locker z ne. Schliesslich bruchi kraft für was anderes!

Ach ja... Ich teile s zimmer anschienend mitem Michele (mis italienische double... sozsäge) - das wird au speziell si. Am Wettkampf simmer natürlich konkurrente aber sust chömemer sehr guet mitenand us. Er isch jetzt nonig im zimmer...vo dem her chani das nöd garantiere.

Jetzt hämmer da 20uhr abig und ich gahne mal nach dem für mich sehr müehsame Tag go schlafe.