Mini Vorbereitig uf d Vorberitig für de 1st Taolu Cup 2016

Irgendwann im Summer 2016 han ich erfahre, dass ich mich für de 1st World Taolu Cup in Fuzhou (China) qualifiziert han. Was isch das?
Die beste 8 Athlete vo de letschte Weltmeisterschaft 2015 in Jakarta werdet zume Wettkampf unter de beste 8 iglade.  Im Nandao (Säbel) bin ich ade WM 7. worde  und somit bin au da debi.

Das isch min aller erste Wettkampf i dere Art wo eifach ebe nur die beste 8 derfet mitmache und klein-nichtAsiate-arbeitetNoch100%-führtEineEigeneSchule-Sami ist dabei.
Wet eifach demit säge dass ich mich natürlich mega gfreut han und es nid eifach isch alles unter eim Huet z bringe! :)

Mis Ziel isch klar: ich will nöd 8. werde und ier lachet jetzt vilicht, aber das wird verdammt schwierig sie! Eifach zum eu das schnell vor d Auge z füehre: es isch nur scho es Wunder, dass ich i de Top10 bin (klar, hät's au was mit mim Training z tue, aber das machet die beste 30 au!)

Also wie gseit Ziel= nöd 8.Platz!

Dass ich mich wieder für so en Wettkampf chan qualifiziere i mine alte 30 Jahr (nei ich bin nöd 15ni)wird eifach immer schwieriger (so Wettkämpf sind meistens all 2 oder 4 Jahr) und darum hani mer jetzt vorgno mich au richtig guet druf vorzbereite - die asträngig die Vergangeheit söll nöd für nüt gis si!

Wo bereitet mer sich am beste vor? Bingo: China


Aber aber aber.... In China mag mer uf dem Niveau viel lerne aber de Körper muen natürlich au defür perat sie - ich trainiere jetzt scho 5-6 mal die Wuche aber für China langet das nid und vorallem nöd i dere Intensität. Da ich kei Lust han uf China zga und denn dete z liide, han ich mer ebe vorgno mich uf China vorzbereite. Darum au de Name vom Blog: Mini Vorbereitig uf d Vorberitig.... - chunsch jetzt drus?

Da ich de Tag dur im Büro schaffe und kei Möglichkeite han Wushu z'trainiere (ussert nachem Schaffe) muen ich mich körperlich und mental irgendwie anderst astränge:

• jede zweiti Morge (6i morge - horror zum ufsta!) gahn ich go jogge und mache paar Üebige für d Stabilität und Rumpf
• 4mal die Wuche gahn ich über de Mittag is Gym und mache geili Bilder vo mier vorem Spiegel....ehhhm nei, ich meine tuen denn je nach Tag mini Bei oder min Oberkörper trainiere mit möglichst viel Gwicht - das wird mich momentan evtl. chli lengsemer mache aber bis zum November (denn findet de Wettkampf statt) han ich zit zum schneller werde.
• am Abig halt s Wushu Training an sich a dene Täg MO, DI, DO, SA, SO

Ich mache das Programm jetzt scho sit rund 2.5 Wuche und s einzige was ich merke isch mini Müedigkeit - Muskelkater oder so hani nid gross oder nur am Afang es bitzeli. Das isch natürlich guet - heisst ich bin nöd schlecht dra. Ja die Müedigkeit hesch denn z China halt nöd, will du immer es Mittagsschläfli chasch mache (klar! muesch ja au nöd schaffe).

Nun zu mim Training in China:
Ich flüge am 30.September ab und lande am 1.Oktober in Shanghai. Retourflüge tuen ich denn am 22.Oktober - sind also rund 3 Wuche - sägemer 1 Monat tönt echli cooler.

In Shanghai trainier ich mitem Shanghai Wushu Team wo ich/mich scho sit bald 10 Jahre guet kennet. Momentan stat mer no es anders törli offe; evtl. chani für 1 Wuche zum Guangdong Wushu Team ga (SüdChina) - mitem Schnellzug vo Shanghai us ca. 6Stund oder mitem Flüger denn knapp 2h. Mueni denn entscheide sobald ich weiss obi ga chan oder nid.

Bis dahni wird ich schön flissig wiitertrainiere und probiere denn z China regelmässigi updates z schribe.

Satt!